Në pritje të vendimit të Francës dhe Holandës Franca dhe Holanda do të japin qëndrimin e tyre për hapjen e negociatave me Shqipërinë dhe Maqedoninë e Veriut të mërkurën, gjatë takimit të ambasadorëve të përhershëm të Bashkimit Europian në Bruksel.
Këtë e kanë bërë të ditur për Televizionin Klan burime zyrtare të Bashkimit Europian. Sipas këtyre burimeve, pas votimit në Bundestag për hapjen e negociatave të anëtarësimit me Maqedoninë e Veriut dhe vënien e disa kushteve për Shqipërinë, pritet që Franca t’i bashkëngjitet qëndrimit gjerman.
Deri tani Parisi ka qëndruar hermetik lidhur me dosjen e Shqipërisë dhe Maqedonisë së Veriut. Nuk dihet ende nëse qëndrimi i Holandës do të jetë ai i shprehur së fundmi nga Ministri i Punëve të Jashtme, Stef Blok.
Në Komisionin për Çështjet Europiane të parlamentit holandez, Stef Blok është shprehur se nuk ka surpriza lidhur me hapjen e negociatave për Shqipërinë, pasi qëndrimi mbetet ai i verës.
Ai i është referuar mocionit të aprovuar nga parlamenti holandez në Qershor të këtij viti, kundër hapjes së negociatave të anëtarësimit me Shqipërinë. Blok ka shtuar se Shqipëria do të hapë negociatat e anëtarësimit kur të përmbushë kushtet.
Ndërsa Maqedonia e Veriut duhet të vlerësohet në mënyrë të pavarur. Nëse Holanda i qëndron Jo-së për Shqipërinë, atëherë Bashkimi Europian pritet të shkojë drejt ndarjes së vendimmarrjes për Maqedoninë e Veriut dhe Shqipërisë.
Ky takim i paraprin mbledhjes se Ministrave të Jashtëm të Bashkimit Europian që zhvillohet në 15 Tetor në Luksemburg, ku do të merret edhe vendimi për Maqedoninë e Veriut dhe Shqipërinë.Tv Klan
