Autoriteti i Konkurrencës ka rrëzuar vendimin e Drejtorisë së Rrugëve dhe subjekteve të tjera, për rritjen e çmimit të patentës në 850 mijë lekë të vjetra. Sipas vendimit, kjo rritje është në kundërshtim të hapur me ligjin dhe për pasojë është e ndaluar.
Akt Marrëveshja ishte lidhur ndërmjet Drejtorisë së Përgjithshme të Shërbimeve të Transportit Rrugor, Shoqatës “Kombëtare të Autoshkollave”, Shoqatës së Autoshkollave “Siguria në rrugë” dhe Drejtorisë së Përgjithshme të Tatimeve”.
Mirëpo, Autoriteti i Konkurrencës thotë se në përfundim të vlerësimit ligjor, u konstatua se akt marrëveshja në fjalë është e ndaluar, pasi me hyrjen në fuqi do të çojë në praktika të njëjta në çmimet/tarifat e pagesës, duke penguar, kufizuar dhe shtrembëruar konkurrencën në treg.
Si e tillë kjo Akt Marrëveshje, në kuptim të nenit 4, pika 2, të ligjit nr. 9121/2003, është e ndaluar!
Nga deklaratat e zyrtarëve publikë, patenta e klasit B, më e zakonshmja që nevojitet për të drejtuar një automjet, do të dyfishohej nga 400 mijë në 850 mijë lekë të vjetra. Sipas Drejtorisë së Transportit Rrugor këto çmime mbulonin kostot reale të autoshkollave dhe shmangnin informalitetin.
Sa më sipër, Komisioni i Konkurrencës, me vendimin nr. 970, datë 24.03.2023 vendosi:
- Akt Marrëveshja nr. 2729 prot., datë 13.02.2023, e lidhur ndërmjet palëve: Drejtoria e Përgjithshme e Shërbimeve të Transportit Rrugor, Shoqata “Kombëtare e Autoshkollave”, Shoqata e Autoshkollave “Siguria në rrugë” dhe Drejtoria e Përgjithshme e Tatimeve, vlerësohet si një akt marrëveshje në kundërshtim me nenin 4 të ligjit 9121.2003, “Për mbrojtjen e konkurrencës”.
- Monitorimin e tregut të shërbimit të përgatitjes dhe pajisjes me leje drejtimi, sipas kategorisë së lejedrejtimit, dëshmisë ose çertifikatës, për një periudhë 1 (një) vjeçare.
- Moszbatimi i këtij vendimi përbën shkelje të rëndë të konkurrencës në kuptim të nenit 74, pika 1, gërma c), të ligjit nr. 9121/2003.
Autoriteti i Konkurrencës – Njoftim Per Shtyp, 24 Mars 2023 by Newsbomb Albania on Scribd
