Kreu i PD-së Lulzim Basha ka reaguar menjëherë pas shfaqjes mbrëmë të kreut të Bashkisë së Durrësit Vangjush Dako në një emision televiziv, ku u shpreh se për votat në zgjedhje do të takonte këdo, qoftë edhe persona që kanë qenë me precedentë të mëhershëm penal.
Për këto deklarata dhe për përfshirjen e Dakos në përgjime kryedemokrati kërkon një hetim të posatshëm, dhe kryebashkiaku i Durrësit të merret menjëherë i pandehur.
Basha ka pasur një apel dhe për drejtueset e prokurorisë Arta Marku dhe Donika Prela, të cilave iu kërkon që të mos manipulojnë hetimet, pasi një ditë vetë ato do të përballen me drejtësinë.
‘’Dua t’i kujtoj Donika Prelës dhe Arta Markut se dëmtimi i provave dhe manipulimi i hetimeve për krimet elektorale të Dakos, Ballës, Gjiknurit, Tahirit e të tjerë, është veprim i rëndë kriminal për të cilën ato do të mbajnë shpejt përgjegjësi deri më një”, shprehet mes të tjerave Basha.
Reagimi i Bashës:
Tashmë është e qartë për këdo se Edi Rama ka patur një plan të mirëmenduar e të shtrirë anembanë vendit, për bashkëpunim me krimin për të vjedhur zgjedhjet. Duhet urgjentisht një hetim i posaçëm dhe i pavarur për këtë operacion kriminal. Vangjush Dako është i pari që duhet të merret i pandehur.
Lënia e tij i lirë edhe pasi pranoi mbrëmë publikisht bashkëpunimin me bandat për të dhunuar zgjedhjet, është shkatërrim i demokracisë dhe vdekje e drejtësisë. Dua t’i kujtoj Donika Prelës dhe Arta Markut se dëmtimi i provave dhe manipulimi i hetimeve për krimet elektorale të Dakos, Ballës, Gjiknurit, Tahirit e të tjerë, është veprim i rëndë kriminal për të cilën ato do të mbajnë shpejt përgjegjësi deri më një. Kur prokuroria mbron krimin, ka rënë shteti.
