Pas protestës së maturantëve përpara Ministrisë së Arsimit në lidhje me provimin e Gjuhës Shqipe dhe Letërsisë, ministrja Shahini bëri një reagim tejet absurd. Në vend që të jepte një zgjidhje për ankesat e maturantëve, të cilët gjykuan se testi ishte formuluar jashtë programit dhe udhëzimeve të ministrisë, si dhe përmbante pyetje shumë të vështira, Shahini hodhi akuza ndaj nxënësve duke thënë se ata janë nxitur prej opozitës për të realizuar protestën e sotme.
Ndërkohë, një tjetër deklaratë absurde e ministres ishte kur tha se besonte se në asnjë vend të botës nuk ka ndodhur që nxënësit të protestojnë për “provime të vështira”. Mirëpo, një gjë e tillë nuk është aspak e vërtetë, pasi mjafton një kërkim i thjeshtë në internet dhe mund të gjesh me dhjetëra lajme në mediat më prestigjoze të botës, të cilat kanë raportuar protestat e nxënësve kundër provimeve të vështira.
Siç shihet dhe në fotot e mëposhtme, protesta të tilla janë zhvilluar edhe në vende që kanë një nivel arsimi shumë më të lartë se vendi ynë, siç është Gjermania, Anglia, apo edhe Hungaria. Mesa duket, Shahini duhet të mirëinformohet përpara se të bëhet qesharake në deklaratat e saj publike, duke qenë se është edhe ministre e Arsimit.
Reagimi i plotë i Shahinit:
Ndoqa me keqardhje protestën pranë ndërtesës së Ministrisë së Arsimit, Sportit dhe Rinisë. Nuk besoj të ketë ndodhur ndokund tjetër që nxënësit të protestojnë për “provimet e vështira”! Megjithatë, keqardhja për nxënësit “protestues” më vjen bashkë me revoltën ndaj nxitësve të tyre! Fatkeqësisht, nxitësit janë publikisht të afishuar dhe nuk janë zëdhënës opinionesh dosido. Ata janë opozita politike e vendit! Që është një absurditet unik: opozita nxit dhe mbështet protestë kundër testeve kombëtare!!! Opozita stimulon “lehtësimin” e dhënies së notave për nxënësit!!! Po mbase këtu s’ka asgjë të re, përderisa kjo opozitë ishte dje qeveria e notave fallco, diplomave fallco, universiteteve fallco, provimeve fallco, promovimeve fallco…Provimet Kombëtare hartohen nga ekspertë provimesh.
Unë i besoj Qendrës së Shërbimeve Arsimore (QSHA) kur thotë se sivjet provimet janë më të lehta se kurdoherë më parë sepse ndodhin pas një gjendjeje të jashtëzakonshme dhe prandaj janë konceptuar vetëm me alternativa – PA TEMAT që janë zhvilluar në kushte shtëpie. Dhe kjo, vërtetohet lehtësisht në fund, kur të mblidhen të gjitha rezultatet dhe nëse rastis që testi të ketë qenë më i vështirë se sa njohuritë e nxënësve, atëherë QSHA BËN RISHPËRNDARJE TË PESHËS SË PIKËVE PËR ÇDO NOTË. Por, këto çështje teknike s’kanë as lidhje e as vend për debate politike dhe jo më për protesta opozitare. QSHA ka adresuar kërkesat në lidhje me provimet e maturës që ishin protokolluar në Ministri. Ndërkohë, ne do të kallëzojmë çdo shpifje që opozita ka publikuar në lidhje me maturën sivjet. Besoj se edhe kjo do të shërbejë në edukimin e të rinjve, duke nisur nga të rinjtë e forumeve politike, për të mësuar se shpifja është gënjeshtër e dënueshme me ligj e jo liri fjale për çfarëdo kundërshtie qytetare apo opozitare.
