Ngjarja e rëndë e ndodhur në Tiranë ka tronditur vendin. Një nënë dhe vajza e saj u gjetën pajetë në banesë ndërsa vajza tjetër u shtrua në gjendje të rëndë në spital.
Ndërsa vijojnë hetimet lidhur me ngjarjen makabre e cila dyshohet si vetëflijim. Gazetarja Klodiana Lala raportoi për “BW” se ekspertiza paraprake e mjekësisë ligjore për trupin e pajetë të 30-vjeçarjes Anisa Josifi ka zbuluar se ajo ka ndërruar jetë 15 muaj më parë. Sipas ekspertëve, trupi është mumifikuar sepse është mbështjellë ditë pas dite me çarçafë të hollë.
Këtë e ka konfirmuar dhe vajza tjetër, 34-vjeçarja Blerta Josifi e cila ndodhet në spital. Blerta ka deklaruar se ajo dhe nëna kanë refuzuar çdo gjë, ushqim, ujë etj për 40 ditë. “Nëna vdiq, unë mbijetova”, i tha policisë 34-vjeçarja. Policia hyri nga dritarja e banjës ditën e djeshme në banesën e tyre sepse ballkoni ishte mbyllur me kangjella hekuri.
Po ashtu raportohet se të afërmit e tyre kishin konstatuar prej nje viti sjelljen anormale të familjes dhe kishin shkuar në polici e bashki disa herë për të kërkuar ndihmë. Ata u përpoqën të ndërgjgjësonin gratë se veprimi po kthehej në rrezik për jetën e tyre.
