Zbardhen detaje të reja nga aksioni i SPAK me Antimafian Italiane, ku u çmontua rrjeti kriminal mes Italisë dhe Shqipërisë, teksa u zbulua skema e mashtrimit me shërbimet shëndetësore në spitalet në Itali.
Në pranga kanë rënë 9 shtetas, mes të cilëve edhe mjekë, si dhe janë sekuestruar 500 mijë euro dhe barna me përmbajtja narkotike me vlerë 20 mijë euro.
Mediet italiane kanë publikuar edhe pamjet e aksionit, ku duken të akuzuarit, teksa marrin çanta me ilaçe apo numërojnë dhe shkëmbejnë tufat me para.
Trafikantët e ilaçeve dhe ‘bluzat e bardha’, që falsifikuan dokumentet për shërbim shëndetësor në Itali ranë në kurth nga autoritetet italiane.
“Hetimi dokumentoi lëshimin e çertifikatave të rreme mjekësore që vërtetojnë nevojën e shtetasve shqiptarë për trajtim urgjent mjekësor jetëshpëtues në Itali, gjë që i lejoi të hyjnë në vend dhe të marrin shërbime mjekësore dhe farmaceutike në kundërshtim me ligjin. Mjekët e korruptuar dyshohen se kanë bashkëpunuar me grupin e organizuar kriminal në këmbim të parave ose shërbime seksuale”, tha më herët SPAK.
