Koronavirusi “troket” edhe në Delvinë. Rasti i publikuar sot nga Ministria e Shëndetësisë, i përket një 64-vjeçari i cili ka rezultuar pozitiv me COVID. 64-vjeçari banon në një familje me katër anëtarë dhe Drejtoria e Shëndetit Publik e Delvinës po vijon me hetimin epidemiologjik të rastit. Për këtë ka reaguar edhe kryetarja e Bashkisë Delvinë, Majlinda Qilimi, e cila përmes një postimi në rrjetet sociale, i bën thirrje qytetarëve të respektojnë rregullat për të shmangur përhapjen e virusit.
POSTIMI: Të nderuar bashkëqytetarë, Në Delvinë është shënuar rasti i parë me Covid19. Duke i uruar shërim të shpejtë personit të infektuar, dëshiroj të risjell në vëmendjen tuaj rregullat që duhet të ndjekim dhe të respektojmë për të shmangur përhapjen e virusit.
#RespektoniRregullat Ruani distancën 1.5 metër Mbani maskë/barriera mbrojtëse kur nuk është e mundur të ruhet distance Lani shpesh duart Dezinfektoni mjediset Për çdo shqetësim telefononi numrin e Urgjencës Kombëtare 127! Nëse keni shenja apo simptoma të ngjashme me Covid19, Ju lutem qëndroni në shtëpi!
Të dashur bashkëqytetarë, dua t’ju siguroj se janë marrë të gjitha masat parandaluese dhe ështe bashkërenduar puna me të gjitha organet përkatëse për të frenuar përhapjen!
Ju lutem respektoni rregullat , mbroni veten dhe të afërmit tuaj! Vetëm duke treguar kujdes, mundemi ta mposhtim COVID!
