Ish-deputeti i PD Fatbardh Kadilli, ka publikuar në rrjetin social Facebook, një video ku shfaqet një studente e Universitetit të Vlorës e cila ka denoncuar praninë e materialit kancerogjen në ambientet ku jetojnë. Përmes një video të postuar në Facebook, Kadili në emër të studentëve tregon se konvikti i djemve është i mbuluar nga material asbesti, një material që shkakton kancer. Studenti në denoncimin e saj thekson se kryeministri para disa ditësh inauguroi fasadën e këtij objekti, i cili është konvikti i gocave, ndërkohë që në krahun tjetër ndodhet konvikti i çunave, i cili është i mbuluar nga një shtresë asbesti ku jetojnë dhjetëra studentë, të cilëve iu rrezikohet jeta.
“Jemi studentë të universitetit ‘Ismail Qemali’ Vlorë, ndodhemi në qendrën studentore të qytetit të Vlorës. Këtu para disa ditësh kryeministri inauguroi fasadën e këtij objekti, i cili është konvikti i gocave, ndërkohë që në krahun tjetër ndodhet konvikti i çunave. Është i mbuluar nga një shtresë asbesti ku jetojnë dhjetëra studentë, të cilëve iu rrezikohet jeta dhe shëndeti, nga një material i rrezikshëm siç është asbesti, i cili është vërtetuar se shkakton kancer. Shtrohet pyetja zoti kryeministër: A ka vlerë jeta jonë apo është më e rëndësishme propaganda e fasadave?”, shprehet studentja.
