Koronavirusi nuk ka kursyer as liderët në mbarë botën, ku shumë prej tyre janë infektuar dhe ja kanë dalë në betejën me këtë virus vdekjeprurës. Kështu ka ndodhur edhe me deputetin e LSDM-së në Maqedoninë e Veriut, Muhamed Zekiri i cili ditën e sotme ka njoftuar se ka fituar betejën me Covid-19, së bashku me bashkëshorten dhe vajzën tre muajshe. Ky lajm është bërë me dije nga vet deputeti, i cili përmes një postimi në rrjetet sociale ka dhënë lajmin e mirë, se është shëruar plotësisht si edhe ka falënderuar mjekët që u kujdesën për të dhe familjen e tij.
Ndër të tjera Zekiri shkruan se familja e tij ka kaluar një sprovë të madhe, të cilën nuk do t’ia kishte uruar as armikut të tij më të madh. “Dua të bëj një falënderim të veçantë për mjekët dhe personelin e klinikës së infektivit. Për ata që kanë sakrifikuar dhe vazhdojnë të sakrifikojnë gjithçka për ne: dr.Ilirin, dr.Milena ,dr.Fadilin dr.Ana stafin tjetër mjekësor të palodhurat Rejhani, Vesna, Elana, Kiki, Suhejla, Fisniku, Nuredini, Velimiri e shumë të tjerë të cilët 24 orë vazhdojnë të jenë në shërbim të pacientëve në repartin e infektivit.”– shkruan ai. Më tej deputeti i LSDM-së ka bërë një mesazh të fortë, për të gjithë ata që nuk besojnë se koronavirusi ekziston, që të ndërgjegjësohen dhe të kujdesën për veten dhe familjarët e tyre.
