Pak ditë më parë në Belgjikë u vra Bledar Muça, i njohur ndryshe si krahu i djathtë i Ardian dhe Florenc Çapjaa. Muça rezultonte i përfshirë në trafikun e drogës në Belgjikë, shtet i cili bashkë me Holandën janë shndërruar dy vendet problematike të Evropës sa i përket trafikut të drogës. Ndërkohë në vazhdën e hetimeve Prokuroria belge ka kërkuar 14 vjet burg për secilin nga drejtuesit e trafikut të drogës që u kap vitin e kaluar dhe që synonte portet evropiane.
Rasti më i fundit nxjerr në pah vërshimin e kokainës dhe parave të mëdha që vijnë nga trafiku i drogës në Holandë dhe Belgjikë, ndërsa bandat si Karteli Kinahan, luftojnë për territore. Gjatë vitit 2021, një total prej 5 miliardë eurosh kokainë u kap në portin holandez të Roterdamit, ndërsa 13 miliardë euro të tjera u kapën në portin fqinj belg, atë të Antwerpit.
“Kokat” e trafikut të drogës në Belgjikë
Fundjavën e kaluar në Antwerp u ekzekutua Bledar Muça. Ai qëndronte aty gjatë viteve të fundit si anëtar kyç i bandës shqiptare që vepronte në trafikun e drogës në portin e këtij qyteti. Por, një problem tjetër nuk është vetëm që gangsterët qëllojnë njëri-tjetrin, por paratë e drogës po përdoren edhe për të korruptuar zyrtarët. Vitin e kaluar u zbuluan një rrjet zyrtarësh të korruptuar të cilët kishin akses në bazat e të dhënave qeveritare dhe të dhënave personale të të gjithë qytetarëve belgë.
Dyshohet se informacioni po përdoret për të korruptuar punonjësit e portit dhe doganierët dhe për të siguruar kalimin pa problem të drogës nëpër porte. Hetimet e fundit në Belgjikë për vrasjen e Muçës kanë çuar edhe në zbulimin e disa personave të korruptuar, duke përfshirë një inspektor policie, një administrator spitali me akses në informacionin personal dhe një zyrtar tatimor. Gangsteri irlandez Christy Kinahan senior ka rekord të sjelljeve të ngjashme në Belgjikë.
Operacioni policor i njohur si Argus në prill 2020 kapi një ngarkesë prej 4,200 kilogramësh në një kontejner në Antwerp. Në Holandë u arrestuan 30 persona dhe në Belgjikë 48 të tjerë, me 17 mijë kilogramë kokainë të sekuestruara. Duke vepruar në bazë të informacioneve policia zbuloi një dhomë torture që dyshohet se përdorej për deri në shtatë vrasje dhe për t’u dhënë ryshfet zyrtarëve të lartë. Ndërkohë kryebashkiaku Bart De Wever është marrë nën mbrojtje pasi i frikësohet një atentati të mundshëm. Burimi: sundayworld.com |
