Një tjetër anëtar i organizatës kriminale shqiptare që vepronte me “seli” dhe bazë në Politeknikun Zografou të Athinës është arrestuar.
Ai është 31-vjeçari Ermir Meta, me origjinë nga Çorovoda, i cili u arrestua sapo u paraqit në Prokurori për t’u interesuar nëse mbi të rëndonte ndonjë vepër penale.
Mediat greke shkruajnë se mbi të rezultonin dy urdhër arreste për pjesëmarrje në bandën e Kampusit të udhëhequr nga famëkeqi “Esko”, një tjetër shtetas shqiptar.
Ermir Meta dhe grupi ku bënte pjesë akuzohen se kanë kryer grabitje mizore si dhe për trafik droge.
Ai ka qenë edhe pjesëtar i bandës së vjetër të grabitësve me kallashnikovë që hynin nëpër shtëpi në periferi të Jugut dhe dhunonin femra, ndërsa së fundmi në një intervistë për një televizion pohoi se nuk kishte lidhje me atë që akuzohej.
Përkundrazi, nga hetimet e policisë u zbulua jo vetëm pjesëmarrja e tij në grupin kriminal, por u provua se ai ishte një nga personat që banonte në rezidencat studentore.
