Sot është Dita Ndërkombëtare e Barazisë së Gruas. Gratë e profesioneve të ndryshme kontribuojnë në shoqërinë shqiptare, por, zakonisht, historitë e kontributit të tyre mbeten të patreguara e të panjohura. Kohët e fundit, projekti i USAID për Planifikimin dhe Qeverisjen Vendore (PLGP) bashkëpunoi me Bashkinë dhe Muzeun Historik të Pogradecit për botimin e një koleksioni biografish, të quajtur “Historia e saj në historinë e Pogradecit”, në mirënjohje të 26 grave të këtij qyteti.
Këto gra kanë dhënë kontribut të jashtëzakonshëm, jo vetëm në përparimin e fushave ku ato ushtrojnë profesionin e tyre, por edhe në jetën shoqërore, politike, intelektuale dhe kulturore të qytetit, duke u bërë pioniere të promovimit të të drejtave të njeriut. Nënkryetarja e Bashkisë së Pogradecit, Entela Gusho e përshëndeti në mënyrë të veçantë këtë publikim. “Në historinë e Pogradecit kemi shumë gra, të cilat shërbejnë si model për gratë dhe vajzat e sotme “, u shpreh ajo.
