Ndihmës Sekretarja e Shtetit për Çështjet Europiane & Euroaziatike Karen Donfried, ka mbarritur në Tiranë ku takimin e parë e ka zhvilluar me të Dërguarin e Posaçëm për Ballkanin Perëndimor Gabriel Escobar, ambasadoren Yuri Kim dhe Komisionerin Europian për Zgjerimin Oliver Varhelyi. Lajmin e ka bërë të ditur Ambasada amerikane me anë të një postimi në ‘Twitter’ ku njoftoi se palët u takuan për të diskutuar mbi prioritetin e përbashkët të integrimit të të gjitha vendeve të Ballkanit Perëndimor në BE.
Ndihmës Sekretarja Donfried rikonfirmoi mbështetjen e fortë të Shteteve të Bashkuara për anëtarësimin e Shqipërisë në Bashkimin Europian dhe tha se SHBA mbetet e angazhuar për të punuar me partnerët shqiptarë dhe të BE-së për të siguruar reformën në drejtësi në Shqipëri dhe rrugën e suksesshme drejt Bashkimit Europian.
“Ndihmës Sekretarja e Shtetit për Çështjet Europiane dhe Euroaziatike Karen Donfried dhe Zëvendës Ndihmës Sekretari i Shtetit dhe i Dërguari i Posaçëm për Ballkanin Perëndimor Gabriel Escobar mbërritën sot në Shqipëri dhe u takuan me Komisionerin Europian për Zgjerimin Oliver Varhelyi. Ata ranë dakord se pushtimi i pajustifikuar i Ukrainës nga Rusia e ka bërë integrimin edhe më urgjent.
Ata diskutuan mbi prioritetin e përbashkët të integrimit të Shqipërisë dhe Maqedonisë së Veriut në Bashkimin Europian dhe Ndihmës Sekretarja Donfried rikonfirmoi mbështetjen e fortë të Shteteve të Bashkuara për anëtarësimin e Shqipërisë në Bashkimin Europian dhe tha se SHBA mbetet e angazhuar për të punuar me partnerët shqiptarë dhe të BE-së për të siguruar reformën në drejtësi në Shqipëri dhe rrugën e suksesshme drejt Bashkimit Europian.”
Gjatë vizitës së saj zyrtare, ajo pritet të takohet me nënkryetarët e Partisë Demokratike, Jorida Tabakun, Enkelejd Alibeajn dhe sekretarin e përgjithshëm Gazment Bardhi. Takimi do të zhvillohet në orën 10:45 ditën e nesërme në kryesinë e Kuvendit. Takimi i Donfried në Tiranë, vjen një ditë para Kuvendit të Komisionit të Rithemelimit.
Pas vizitës në Kosovë para tre ditësh, zyrtarja e lartë amerikane vizitoi Serbinë ndërsa sot ishte në Maqedoninë e Veriut e tashmë ka mbërritur në Shqipëri. Karen Donfried, gjatë vizitës në Shkup, ditën e sotme, i ka dhënë mbështetje Maqedonisë së Veriut dhe Shqipërisë për fillimin e bisedimeve për anëtarësim në Bashkimin Evropian.Top Channel
