Këshilli bashkiak i Durrësit miratoi sot dhënien e ndihmës financiare, sipas listës së gjashtë me subjektet përfitues të programit të grantit për rikonstruksionin ose riparimin e banesave të dëmtuara si pasojë e dëmeve të shkaktuara nga fatkeqësia natyrore e tërmetit të datës 26 nëntor 2019.
Në mbledhjen e zhvilluar me mjete të komunikimit elektronik Këshilli Bashkiak miratoi disa vendime të rëndësishme, si familjet përfituese të ndihmës ekonomike nga fondi i kushtëzuar për bllok ndihmën ekonomike deri 6 % dhe fondi nga të ardhurat e bashkisë për muajin shtator 2020, miratimin e “rregullores për marrëdhëniet e këshillit bashkiak me publikun dhe median”.
Po ashtu Këshilli Bashkiak miratoi vijimin e procedurave të prishjes së detyruar të 4 banesave private të ndodhura në njësinë administrative nr.5, Durrës të gjitha pronë private në zbatim të ekspertizave të thelluara të hartuara nga Instituti i Ndërtimit, Tiranë, miratimin e listës së familjeve përfituese të subvencionimit të qirasë të mbetura të pastreha si pasojë e shembjes së banesave të tyre.
Njëkohësisht u miratua edhe prishja e detyruar e godinës 1 kt, që i përket kopshtit Kuçok, që mban nr. 10, të listës së transferimit dhe të godinës 1 kt, që i përket kopshtit me vendndodhje në fshatin Radë, që mban nr. 13, të listës së transferimit, njësia administrative Manëz, që me VKM nr.538, datë 7.8.2012, bëjnë pjesë në listën paraprake të pronave të bashkisë Manëz (sot bashkia Durrës), për shkak se janë dëmtuar nga fatkeqësia natyrore e datës 26 nëntor 2019 dhe përbën rrezik shumë të lartë për jetën dhe shëndetin dhe rekomandohet të demolohen.
Këshilli Bashkiak miratoi edhe prishjen e detyruar të ndërtesës së administratave të njësive administrative Katund i Ri dhe Ishëm, bashkia Durrës, për shkak se janë dëmtuar nga fatkeqësia natyrore e datës 26 nëntor 2019 dhe përbën rrezik shumë të lartë për jetën dhe shëndetin, si dhe prishjen e shkollës së vjetër 9-vjeçare “Riza Shera”, Radë, njësia administrative Manëz.Atsh
