Një person ka pranuar se ka pasur rol në një organizatë që merrej me trafikun e qenieve njerëzore drejt Britanisë së Madhe. Katër persona të tjerë që janë vënë po ashtu në pranga në lidhje me këtë rast kanë mohuar që të kenë kryer këtë vepër penale.
Sipas asaj që shkruajnë mediat, ky grup përdorte gomone për të udhëtuar në Belgjikë, mblidhte emigrantët dhe i çonte në Margate të Kent-it. Përgjatë një viti, sipas Agjencisë Kombëtare të Krimit, grupi kryente disa “rrugë”.
Më 17 Prill u zhvillua seanca dëgjimore ku 51-vjeçari Banet Tershana pranoi se kishte lehtësuar kryerjen e një shkeljeje ose tentative për shkeljen e ligjit të emigracionit. Shokët e tij, Arsen Feci, 44 vjeç, Klodian Shenaj, 48 vjeç dhe Jetmir Myrtaj, 44 vjeç, të gjithë shqiptarë i mohuan akuzat. Pjesë e grupit ka qenë edhe një irlandez, Desmond Rice, 46 vjeç, i cili po ashtu ka mohuar akuzat.
Tershana, Rice, Feci dhe Shenaj u arrestuan më 28 Shkurt, ndërsa Myrtaj më 15 Mars. 12 emigrantë, të cilët mendohet se janë të gjithë shqiptarë duke përfshirë edhe një fëmijë, u morën në ruajtje nga autoritetet belge pasi një anije u sekuestrua në Essex. Tershana kërkoi lirinë me kusht, por kjo u refuzua. Ai qëndron në qeli së bashku me Shenajn dhe Rice. Ndërsa Myrtaj dhe Feci janë liruar me kusht.
