Një ngjarje e rëndë është regjistruar në fshatin Vreshtas të bashkisë Maliq, ku një 14-vjeçar është gjetur pa shenja jete në banesën e tij.
Sipas informacioneve paraprake, i mituri vuante prej kohësh nga epilepsia dhe kishte probleme të lindura me zemrën.
Ka qenë nëna e tij ajo që ka kërkuar ndihmë mjekësore, por kur ekipi i urgjencës ka mbërritur në banesë, 14-vjeçari ishte tashmë pa shenja jete.
Në vendngjarje kanë shkuar edhe shërbimet e Policisë, të cilat po kryejnë veprimet procedurale dhe hetimore për të sqaruar plotësisht rrethanat e ngjarjes.
Mësohet se i mituri jetonte me nënën dhe njerkun e tij, pasi prindërit ishin të divorcuar. Deri tani, të dhënat paraprake nuk tregojnë për rrethana të dyshimta, ndërsa pritet ekspertiza mjeko-ligjore për të përcaktuar shkakun e saktë të vdekjes.
