Pas Greqisë edhe Italia ka autorizuar nisjen e kërkimeve për naftë në Detin Jon.
Sipas Buletinit zyrtar të Ministrisë së Zhvillimit Ekonomik në Itali kërkimet do të bëhen në një sipërfaqe prej 2200 Km2 dhe do të shtrihen deri në pikën e kufirit detar mes Italisë dhe Shqipërisë.
Sipas marrëveshjes për delimitimin detar të vitit 1992, leja përcaktohet pa paragjykimin e palëve të treta. Megjithatë një marrëveshje përfundimtare mes tre vendeve kufitare Italisë, Shqipërisë dhe Greqisë ende nuk ekziston.
Vendimi për të bërë kërkime për hidrokarbure në Detin Jon ka ngjallur reagime dhe ka përplasur partitë brenda koalicionit. Ministri i Mjedisit Segio Costa tha se nuk ka firmosur dhe nuk do të firmosë kurrë një urdhër për kërkime në det.
Ambientalistët i kujtojnë lëvizjes 5 Yjet, premtimet elektorale kundra kërkimeve detare dhe kundër gazsjellësit TAP. Mirëpo lideri i 5 yjeve dhe zv/kryeministri Luigi Di Maio mbrohet duke thënë se këto kërkime janë autorizuar nga qeveria e kaluar e Paolo Gentilonit.
Kërkime në jugperëndim të Korfuzit ka autorizuar edhe Greqia, e cila pritet që në muajin Tetor të ligjërojë shpalljen e ujerave territoriale ne 12 milje siç pohoi para pak ditësh ministri i Jashtëm plotësues i Greqisë Jorgos Katrugalos.
