Aktorja e kinematografisë shqiptare, Pranvera Lumani dhe kompozitori Valentin Veizi kanë qenë të ftuar dje pasdite në emisionin “Rudina”. Të dy ata janë kontribues të artit në Shqipëri dhe prej 22 vitesh jetojnë në Shtetet e Bashkuara të Amerikës. Pranvera dhe Valentini janë rikthyer me artin e tyre në Shqipëri pas disa vitesh, ku janë të dy pjesë e filmit “I love Tropoja”. Pranvera luan rolin e nënës së personazhit kryesor në këtë film, ndërsa Valentin Veizi është kompozitori i kolonës zanore të filmit “I love Tropoja”. Kompozitori Valentin Veizi ka zbuluar për herë të parë edhe talentin e veçantë të këngëtares mjaft të njohur sot Elsa Lila. Në studio, ai ka treguar se zëri i saj unik ka spikatur midis fëmijëve të tjerë.
“Atje ku ishim nuk kishim asnjë njeri. Ishte Vali, unë dhe fëmijët. Kështu që, ose do merresha me fëmijët ose me punën. Në momentin që me kujtoje Tiranën, prindërit, motrat, unë mallëngjehesha dhe duhet t’i thosha vetes mbyll një kapitull tjetër dhe nis një të ri”, ka thënë Pranvera teksa kujtonte muaj e parë të jetës në SHBA. Po ashtu ajo ka rrëfyer se shpesh njerëzit në rrugë i kujtonin shprehjen e filmit ‘Ëëë të vde.ktë nëna që të ka bërë’, duke thënë se pavarësisht se nuk i pëlqente si shprehje i vlerësonte njerëzit që e donin.
