Rrënjët e hakmarrjeve mbeten ende të gjalla në vendin tonë. Mediat kanë zbuluar detaje të reja nga e shkuara e 47-vjeçarit Prekë Tonaj që u ekzekutua mbrëmjen e së dielës në gshatin Grudë e Re në Shkodër.
Të njëjtat burime thonë se ai po qëndronte në një nga lokalet e zonës rreth orës 19.15 kur i janë afruar dy persona të maskuar të cilët fillimisht kanë përmendur një emër dhe pas kanë hapur zjarr me breshëri duke e lënë të vdekur në vend babain e katër fëmijëve.
Autorët nuk janë identifikuar ende. Policia ka ngritur postblloqe në zonë ndërsa ka nisur edhe marrjen në pyetje e personave që kanë qenë të pranishëm në momentin e ngjarjes. Tonaj ishte punonjësi i Ndërmarrjes Ujësjellës Kanalizime të Shkodrës.
Ai rezulton person me precendetë penal pasi në 2011 është arrestuar së bashku me 2 persona të tjerë. Sipas njoftimit të policisë së asaj kohe ai, së bashku me djalin e tij dhe një person tjetër tentuan të vrasin një person për motive hakmarrjeje në fshatin Vuksan të Shkodrës.
Është ende e paqartë nëse kjo ngjarje e 11 viteve më parë ka lidhje me ekzekutimin e së dielës. Sipas të njëjtave burime, Prek Tonajt i janë vrarë edhe dy vëllezër vite më parë.
