Policia e Korçës ka goditur një grup kriminal që kultivonte, prodhonte dhe trafikonte kanabis drejt Greqisë. Operacioni “Grupi” çoi në pranga dy financuesit e aktivitetit, Leonard Xhemollari, 45 vjeç, nga Maliqi dhe Gentian Muço, 48 vjeç, nga Korça, ndërsa dy organizatorët, Rexhildo Berberi, 42 vjeç dhe Abidin Guraj, 35 vjeç, janë shpallur në kërkim.
Hetimet zbuluan se droga prodhohej në fshatin Polovisht të Maliqit dhe më pas magazinohej në Voskop, ku thahej dhe përpunohej për transport drejt Greqisë.
Gjatë aksionit, policia sekuestroi fenelina policie, pajisje GPS, kamera dhe mjete regjistrimi të fshehta, targa makinash, USB, karta memorie, laptopë, dronë dhe kontrata automjetesh. Në një nga banesat u gjet edhe një ambient i përshtatur për punime mbi automjete, që dyshohet se përdorej për përgatitjen e mjeteve për transportin e drogës.
Të katër të dyshuarit lidhen edhe me katër raste të mëparshme trafikimi të goditura nga policia. Hetimet vazhdojnë për të identifikuar bashkëpunëtorë të tjerë.
