Drejtoria Vendore e Policisë Elbasan ka reaguar në lidhje me një video të publikuar në rrjete sociale, ku shfaqet një automjet police duke kryer manovra të rrezikshme dhe parakalime të gabuara në rrugë.
Përmes një komunikate zyrtare. DVP Elbasan bën me dije se inspektori i policisë që ka kryer këtë shkelje është gjobitur me 3 mijë lekë të reja, masën administrative maksimale për këtë shkelje.
Gjithashtu policia njofton se ka nisur një hetim në lidhje me inspektorin për shkelje të lehtë të detyrës.
“Menjëherë pas publikimit të kësaj video-je, shërbimet e Sektorit të Qarkullimit Rrugor të DVP Elbasan kanë ndëshkuar drejtuesin e këtij automjeti, punonjësin e Policisë inspektor A. B., me masën administrative maksimale për shkeljen e kryer (3000 lekë të rinj), bazuar në pikën 15, të paragrafit të 2-të, të nenit 146 të Kodit Rrugor.
Drejtuesi i automjetit, inspektor A. B. ka bërë shlyerjen e menjëhershme të masës administrative.
Gjithashtu, për punonjësin e Policisë inspektor A. B. ka nisur hetimi administrativ, për shkelje të lehtë”, njofton policia
