Një pasdite e zakonshme në rrugën “Gravellona 7” në Vigevano u shndërrua në një skenë lufte, kur 50-vjeçari shqiptar Dritan Qafa shkaktoi një valë dhune që vuri në alarm të gjithë lagjen dhe angazhoi njësitë elitë të policisë italiane. Gjithçka nisi me një sulm brutal ndaj pronarit të tij 75-vjeçar, i cili pas goditjeve të marra u transportua me urgjencë drejt spitalit San Matteo. Por agresioni nuk u ndal me aq. Muratori, i armatosur me një pushkë të prerë kalibër 12, të cilës i ishte fshirë numri i serisë për të humbur gjurmët, ktheu shënjestrën nga punëtorja shtëpiake e banesës.
Në një moment paniku të pastër, ai qëlloi dy herë në drejtim të gruas 63-vjeçare. Fatmirësisht, ajo arriti të reagonte me shpejtësi duke u fshehur pas një dere, veprim që i shpëtoi jetën, megjithëse mbeti e lënduar në krah nga ciflat e xhamit që u shpërthyen prej predhave. Pas këtyre akteve, Qafa u ngujua brenda shtëpisë, e njëjta adresë ku dy vite më parë kishte qenë protagonist i një tjetër ngjarjeje të përgjakshme, kur kishte qëlluar në kokë një fqinj me origjinë egjiptiane.
Rrethimi i banesës zgjati për orë të tëra, ndërsa një negociator i policisë u përpoq pa sukses të bindte shqiptarin të dorëzohej paqësisht. Përballë refuzimit të tij dhe rrezikshmërisë së lartë, në terren zbarkuan specialistët e Njësive të Reagimit të Parë (UOPI). Ndërhyrja ishte e rrufeshme dhe taktike: forcat speciale përdorën fillimisht granata zhurmuese për të çorientuar autorin dhe më pas e neutralizuan atë përmes një goditjeje me taser elektrik.
Dritan Qafa u prangos dhe u dërgua fillimisht në stacionin e policisë e më pas në qelitë e burgut të Pavias. Mbi të rëndojnë akuza të rënda që nisin nga tentativa e vrasjes së dyfishtë deri te armëmbajtja pa leje dhe rezistenca ndaj forcave të rendit. Ndonëse marrja në pyetje nga gjyqtarja Daniela Garlaschelli është shtyrë përkohësisht, hetuesit po punojnë për të zbardhur arsyet e thella që e shtynë 50-vjeçarin të përsëriste skenat e dhunës në të njëjtin vend ku kishte tentuar vrasjen edhe në të kaluarën.
