Një nga lëvizjet më të diskutuara nga ekrani i Top Channel këtë sezoni të ri televiziv është ajo e Eno Popit, të cilin ishim mësuar ta shihnim çdo pasdite në ekran. “Dilema- Deal or no deal” e ka mbaruar ciklin e tij, kjo pasi pas ndryshimeve të fundit, emisioni nuk transmetohet më.
Vendin e tij e ka zënë ‘Përputhen’, nën moderimin e Bora Zemanit, teksa të gjithë donim të dinim nëse Eno do vijë me ndonjë program të ri dhe kur apo nëse ka ndryshuar logon e televizionit. Të gjitha pyetet kanë marrë përgjigje ditën e sotme. Eno Popi po rikthehet në radio me një emision të ri, të titulluar “Filloje nga Zero” – “Dilema Sociale”.
“Top Albania Radio” ka dhënë lajmin e bukur në rrjetet sociale, duke na lënë edhe pak në pritje lidhur me datën e fillimit të emisionit radiofonik. Mesa kuptuam nga promoja e programit, duket se do jetë diçka tepër e veçantë e paparë më herët në vendin tonë, kushtuar udhëkryqeve të shoqërisë në shekullin që jetojmë.
Në njoftim thuhet se mes intervistave dhe monologjeve, Eno do të përplasë ide dhe opinione, do të shpërfaqë të vërteta e thyejë mite e teori konspirative dhe mbi të gjithë shoqërojë dëgjuesin me atë që i mungon gjithmonë e më tepër sot, media cilësore dhe frymëzuese.
Nën moton “Filloje nga Zero” – “Dilema Sociale” do të ketë mision të bëjë dëgjuesin të mendojë dhe të mos ndihet i vetëm në botën e miqësisë virtuale, Pandemive Globale, rrënimit të Demokracisë dhe sfidave të tilla të ngjashme.
