Presidenti turk Rexhep Tajip Erdogan para pak ditësh ishte në Shqipëri në një vizitë zyrtare e cila fokusin e kishte te inspektimi i banesave të ndërtuara në Laç por edhe nënshkrimin e marrëveshjeve me qeverinë shqiptare. Vizita e tij më 17 janar, përkoi me ditën e vdekjes së Skënderbeut dhe kjo ngjalli shumë debate dhe jo vetëm. Vizita e tij një ditore në Tiranë shkaktoi shumë kaos dhe trafik në rrugë pasi shumë akse u bllokuan për orë të tëra.
Por duket se pavarësisht të gjithave, Erdogan do rikthehet sërish në vendin tonë. Mediat turke shkruajnë se gjatë një konference ditën e djeshme Erdogan, ka deklaruar se do të mbërrij sërish në Tiranë në hapjen e xhamisë së Namazgjasë, punime të cilat po bëhen me fondet turke. Ai gjithashtu foli edhe për pritjen që iu bë dy ditë më para në vendin tonë, ku tha se ishte madhështore, ndërkohë që përmendi edhe lidhjen që kanë dy popujt.
