Monedha evropiane, por edhe monedha të tjera të huaja i janë rikthyer rënies gjatë fundjavës. Sipas kursit zyrtar të Bankës së Shqipërisë një euro po shkëmbehet me rreth 123 lekë duke arritur vlerën më të ulët gjatë këtij viti. Dobësimi i euros ndaj lekut shqiptar ka ardhur si pasojë e efekteve psikologjike të grabitjes së ndodhur në Rinas ndërsa pritshmëritë janë që euro të vijoj të dobësohet.
Monedha evropiane i është rikthyer rënies gjatë tre ditëve të fundit duke kapur vlerën e 123 lekëve.
Sipas të dhënave të kursit zyrtar të Bankës së Shqipërisë pas një stabilizimi euro ka humbur pikë ndjeshëm ndaj lekut shqiptar.
Zhvlerësimi ka nisur pas grabitjes së ndodhur në aeroportin e Rinasit. Ekspertët e shpjegojnë këtë situatë me efekte psikologjike ndërsa parashikohet që të zgjasë edhe për pak kohë.
Zhvlerësimi i euros dëmton ndjeshëm eksportet shqiptare të cilët i blejnë produktet me lekë dhe i shesin në euro. Po ashtu sipas të dhënave të Instat rezulton se Eksportet, gjatë tremujori të parë janë ulur me 3,0 %, krahasuar me një vit më parë.
Grupet që kanë ndikuar negativisht në uljen vjetore të eksporteve, janë: “Minerale, lëndë djegëse, energji elektrike” “Materiale ndërtimi dhe metale”si dhe ,“Tekstile dhe këpucë”. Por një euro e dobët është shumë pozitive për ata qytetarë që kanë një kredi në këtë monedhë pasi do të paguajnë më pak për këstin mujor. Po ashtu edhe për borxhin e qeverisë një euro e dobët ndikon direkt në uljen e interesave.
Sipas ekspertëve duke qenë se jemi në prag të hapjes së sezonit turistik monedha evropiane pritet që të vijoj të jetë në nivele të ulta për shkak të ardhjes së turistëve në Shqipëri.
Banka e Shqipërisë bleu 180 mln euro gjatë vitit 2018 vetëm për të stabilizuar kursin e këmbimit valutor.
