Antony, sulmuesi brazilian për të cilin Manchester United ka paguar 100 milionë euro, tregoi fëmijërinë e tij të vështirë. “Unë jetoja në zemër të lagjes së klasës punëtore. 20 metra nga shtëpia ime kishte trafikantë droge. Ndonjëherë dilja të shikoja ndeshje futbolli të dielën dhe ishte ajo erë, një erë kanabisi, që hynte në shtëpi.
“Unë isha thjesht një djalë i përulur”, – shpjegoi Antony në një intervistë shumë personale për “Sky Sports”. Për jetën e tij në geto, futbollisti 22-vjeçar saktësoi: “Nuk kisha dhomë gjumi, flija në divan.
Nuk kisha këpucë sporti për të luajtur futboll. Ka pasur raste kur vëllai, motra ime dhe unë qanim dhe përqafoheshim duke menduar për jetën tone shumë të vështirë”.
Antony, i cili iu bashkua akademisë së të rinjve të Sao Paulo në vitin 2010, kur ishte vetëm 10 vjeç, më 2020 nënshkroi për Ajax. Ai tregoi kushtet e vështira të jetesës që familja e tij duhej të duronte: “Kishte momente në mes të natës kur ngriheshim të alarmuar. Uji vërshonte në shtëpinë tonë”.
Duke kujtuar ato momente të vështira të fëmijërisë së tij, Antony donte t’ia kushtonte golin e parë të shënuar me fanellën e Manchester United familjes së tij: “Ai gol ishte për familjen time dhe tifozët. Ishte moment shumë emocionues, më lumturoi pa masë”.