Të plagosurit e ngjarjes së rëndë që ndodhi sot në Velipojë, nëna me tre fëmijët e saj, janë dërguar në spitalin e QSUT-së në Tiranë, në repartin e Djegie Plastikës.
Pavarësisht faktit se është e dielë dhe shumica e mjekëve janë pushim, i gjithë stafi i shërbimit të djegies është paraqitur në punë. Mësohet se prognoza për të plagosurit është tejet e rëndë dhe janë në rrezik për jetën. Mjekët thonë se pavarësisht se janë hedhur në pishinë në momentin e parë kjo nuk i ka ndihmuar aspak, pasi uji ka qenë me klor.
Ndërkohë në hyrje të Spitalit shihen edhe familjarët e të plagosurve, të cilët ndodhen në ankth të madh dhe nuk i mbajnë dot lotët.
QSUT bën të ditur se pacientët e paraqitur, Klarisa Gjoka 15 vjeç, Danjela Gjoka 19 vjeç, Enrik Gjoka 12 vjeç dhe Alketa Gjoka 40 vjeç kanë marrë djegie të rënda në trup.
