Policia ka vënë në pranga shoferin e automjetit tip “Fiat Punto” që aksidentoi për vdekje një 24-vjeçar të identifikuar si Qani Metaj dhe më pas ia mbathi nga vendi i ngjarjes. Ngjarja ndodhi mbrëmjen e kaluar në fshatin Qenas. Shoferi 28 vjeç, i identifikuar si Klaos Mahmutaj, u arrestua dhe akuzohet për 2 vepra penale.
Njoftimi i policisë: Identifikohet, kapet dhe arrestohet drejtuesi i mjetit i cili pasi aksidentoi me pasojë vdekjen një shtetas në fshatin Qenas, u largua nga vendngjarja.
Specialistët e Sektorit të Qarkullimit Rrugor në DVP Fier, në vijim të veprimeve hetimore dhe procedurale të kryera për zbardhjen e rrethanave dhe dokumentimin e ngjarjes së ndodhur në fshatin Qenas ku u aksidentua me pasojë vdekje shtetasi Q. M., bënë të mundur identifikimin dhe kapjen e autorit së bashku me mjetin e tij tip “Fiat Punto”, i cili pasi aksidentoi me pasojë vdekjen 24- vjeçarin, u largua nga vendngjarja.
U arrestua për veprat penale “Shkelje e rregullave të qarkullimit rrugor” dhe “Largim nga vendi i aksidentit”, shtetasi K. M., 28 vjeç, banues në Fier. Materialet i kaluan Prokurorisë pranë Gjykatës së Shkallës së Parë Fier për veprime të mëtejshme.
