3 shtetas janë shpallur në kërkim nga policia e Fierit. Specialistët e seksionit për Hetimin e Trafiqeve të Paligjshme në DVP Fier organizuan operacionin policor të koduar “Tranzit”.
U siguruan prova për veprimtarinë e paligjshme të 3 shtetasve: L.M., 32 vjeç, banues në Patos; A.T., 31 vjeç, banues në Fier dhe K.M., 56 vjeç banues në Tiranë.
Këta shtetas dyshohet se transportonin emigrantë kundrejt pagesës që të kalonin kufirin ilegalisht. Ata braktisën automjetet e tyre dhe u larguan duke përfituar nga errësira. 2 automjetet tip “Audi Q7″ dhe Volkswagen”, me të cilët transportoheshin 11 emigrantë të paligjshëm nga India dhe Nepali, u sekuestruan nga policia.
Njoftimi i Policisë:
Fier
Si rezultat i punës së vazhdueshme, strukturat e DVP Fier godasin një rast të veprimtarisë kriminale të dhënies ndihmë emigrantëve, për kalim të paligjshëm të kufirit.
Në bazë të informacioneve të siguruara nga inteligjenca policore, se 3 shtetas transportonin në bashkëpunim, kundrejt pagesave, emigrantë, më qëllim që ata të kalonin ilegalisht kufirin, specialistët e Seksionit për Hetimin e Trafiqeve të Paligjshme të DVP Fier, në bashkëpunim me shërbimet e Komisariatit të Policisë Mallakastër, organizuan operacionin policor të koduar “Tranzit”.
Si rezultat i këtij operacioni u siguruan prova nga të cilat u identifikuan shtetasit me iniciale L. M., 32 vjeç, banues në Patos, A. T., 31 vjeç, banues në Fier dhe K. M., 56 vjeç, banues në Tiranë, si autorë të veprës penale “Ndihma për kalim të paligjshëm të kufijve” e kryer në bashkëpunim.
Të 3 shtetasit e mësipërm u shpallën në kërkim, pasi braktisën automjetet dhe u larguan duke përfituar nga kushtet e errësirës.
Sekuestrohen 2 automjetet tipe “Audi Q7” dhe “Volkswagen”, me të cilat transportoheshin 11 emigrantë të paligjshëm me origjinë nga India dhe Nepali.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
