Në lidhje me një takim që ka realizuar kreu i Lëvizjes Vetëvendosje, Albin Kurti, me ambasadorin britanik, Nicholas Abott, ka reaguar President i Serbisë, Aleksandar Vuçiç.
Shkak është bërë flamuri shqiptar që ndodhet mbrapa ambasadorit Abott dhe Kurtit.
Përmes një postimi në Twitter, Vuçiç ka pyetur ambasadorin britanik se në cilin shtet i ka fituar zgjedhjet Albin Kurti. Gjithashtu ai thekson se do vazhdojë ta bëjë këtë pyetje derisa të marrë një përgjigje.
“Pyetja ime për ambasadorin e Britanisë së Madhe në Prishtinë: Cilat zgjedhje i ka fituar Kurti, në çfarë shteti? Dhe flamuri që i qëndroni përballë cilit shtet i takon, shkëlqesia juaj? Unë do të vazhdoj t’iu pyes derisa të marr një përgjigje për këto pyetje”, ka shkruar Vuçiç në llogarinë e tij në Twitter.
Me flamurin e Shqipërisë në sfond janë fotografuar edhe ambasadorë të tjerë të vendeve të huaja në Kosovë, duke përjashtuar këtu ambasadorin gjerman, Christian Heldt dhe atë të SHBA-ve, Philip Kosnett.
