Gjykata e Tiranës ka caktuar masën e sigurisë “arrest shtëpie”, për 30-vjeçaren që braktisin foshnjën e saj në një bodrum pallati në zonën e Yzberishtit në Tiranë Avokati i saj ka kërkuar kryerjen e një akt eskpertimi psikik, për të vlerësuar gjendjen mendore të saj.
Ngjarja e rëndë u regjistrua katër ditë më parë, kur foshnja e seksit mashkull u gjet në një divan në bodrumin e pallatit. Bebja u transportua me urgjencë në spital, por fatkeqësisht ndërroi jetë disa orë më vonë. Në momentin që është dërguar në reanimacion foshnja ka qenë i mbuluar me gjak e baltë.
Foshnjës i është konstatuar hipotermi e thellë, gërvishtje e syrit të majtë, të gojës, të gishtave të dorës së djathtë me falanga të ruajtura, të cilat u evidentuan pas larjes së bebes. Pas ngjarjes, policia arrestoi nënën 30-vjeçare e cila ka deklaruar se ishte e pamartuar dhe se kishte fshehur shtatzëninë nga familja e saj.
Në dëshminë e dhënë 30-vjeçarja u shpreh se ishte ndjerë në presion pasi familjarët e saj nuk kishin ditur gjë për shtatzaninë dhe se i dashuri i saj e kishte braktisur duke mos u interesuar për të.
