Situata në të cilën ndodhen maternitetet shqiptare, po rëndohet çdo ditë e më shumë. Mungesa e inkubatorëve dhe e pajisjeve të tjera mjekësore për të trajtuar foshnjet e lindura para kohe, po sjell rritjen e vdekshmërisë foshnjore.
Sipas të dhënave nga BIRN, nga dita e Krishtlindjeve 2017 deri më 15 janar 2018, 11 foshnja të lindura ‘premature’ humbën jetën në këtë spital universitar. Materniteti “Koço Gliozheni’ ka pranuar se gjysma e këtyre vdekjeve mund të ishin parandaluar, nëse spitalit nuk do t’i mungonin aparaturat e nevojshme mjekësore.
Deklarata e maternitetit “Koco Gliozheni”:
“Në më shumë se 50% të rasteve që ndërruan jetë në fillim të janarit bëhet fjalë për shtatzani shumë të vogla, për të cilat ne nuk kemi teknologji të përshtatshme për të siguruar mbijetesën,” tha spitali në një përgjigje me shkrim.
Shifrat e vdekshmërisë foshnjore në Shqipëri janë ndër më të lartat në rajonin e Ballkanit. Sipas të dhënave të raportuara nga INSTAT dhe dy qendrat universitare spitalore obsetriko-gjinekologjike ‘Koço Gliozheni’ dhe ‘Mbretëresha Geraladinë’, më shumë se një e treta e lindjeve në vend ndodh në këto dy maternitete.
Materniteti “Mbretëresha Geraldinë” deklaron 7120 lindje të reja, ndërkohë që numri i foshnjave që ndërruan jetë në këtë spital deri në një muaj pas lindjes është 38 . Për periudhën janar-qershor 2018, ky maternitet regjistroi 3117 lindje të reja, ndërkohë që kanë ndërruar jetë 25 prej tyre, përkundër 445 rasteve që kanë pasur nevojë për reanimim neonatal.
Vlen të përmendim se materniteti “Koço Gliozheni” ka një mungesë të theksuar inkubatorësh dhe shumica e inkubatorëve ekzistues janë jashtë funksionit.
E ndërkohë që situata po del jashtë kontrollit, e njëjta gjë ndodh edhe për qytetet e tjera të Shqipërisë. Vlen të përmendim qytetin e Korçës, Shkodrës, Durrësit, por edhe në qytete ku ka më pak popullsi. Kushtet në maternitetet shqiptare lënë për të dëshiruar, por Drejtoria e Spitalit dhe Ministria e Shëndetësisë mesa duket kanë bërë një vesh shurdh dhe një sy qorr përballë fakteve që flasin vetë.
