TIRANË, 18 dhjetor /ATSH/ – Tërmeti i 26 nëntorit shkaktoi dëme të rënda edhe në monumentet e kulturës së zonës së prekur, sidomos në kalanë e Prezës dhe atë të Krujës. Që në momentet e para pas tërmetit u morën masa për kufizimin e qarkullimit të automjeteve dhe këmbësorëve pranë Kalasë së Prezës ku dëmtimet në të janë të dukshme. Në Kalanë e Prezës tashmë janë vendosur tabela në dy gjuhë në ship dhe anglisht të cilat sinjalizojnë rrezikun për qytetarët.
“Që në orët e para, pas tërmetit të 26 nëntorit, morëm masa për kufizimin e qarkullimit të automjeteve dhe këmbësorëve, pranë Kalasë së Prezës , ku dëmtimet ishin të dukshme. Tashmë tabelat, që sinjalizojnë rrezikun, janë vendosur në shqip e në anglisht. Ju lutemi që të zbatoni masat e sigurisë”, shprehet ministrja e Kulturës Elva Margariti.
