Pogradeci, qyteti magjik i liqenit të Ohrit, është ndër qytetet që i mban hapur dyert për vizitorët në të katër stinët e vitit. Sportet ujore në qytetin liqenor si “Stand up paddle”, xhiro me Lyhnidas-in e shumë e shumë risi të tjera do jenë pjesë e sezonit veror këtë vit në qytetin e Pogradecit. Bashkia Pogradec njofton se subjektet që operojnë në sektorin e turizmit do të zhvillojnë aktivitetin e shërbimeve turistike, konform respektimit të protokolleve të mbrojtjes nga COVID-19.
Ndërsa bashkia është kujdesur për riparimin e infrastrukturës në akset pedonale më të frekuentuara nga vizitorët, gjelbërimin e mjediseve dhe mbi të gjitha ka kryer dezifektimin e hapësirave publike duke garantur higjienë dhe siguri. Pogradeci është nga ato qytete ku qetësia e freskia janë shplodhëse. Krahas peizazhit të bukur natyror, liqeni i Ohrit është atraksioni parësor për të kaluar pushimet në këtë qytet.
