“I nxehti rekord, i regjistruar në muajt qershor dhe korrik në Francë, shkaktoi vdekjen e 1435 njerëzve, 567 prej të cilëve vdiqën në periudhën 24 qershor – 7 korrik, ndërsa 868 të tjerë vdiqën nga 21 deri më 27 korrik”, – ky është informacioni më i fundit i Ministrisë së Shëndetësisë franceze.
Ministrja e Shëndetësisë Agnes Buzyn duke folur për Radio Francën, tha se gjysma e viktimave kanë qenë mbi 75 vjeç. Ajo shtoi se, falë masave parandaluese, norma ka qenë dhjetë herë më e ulët se në periudhën e njëjtë në vitin 2003, kur Evropa ishte e përfshirë nga një tjetër valë vdekjeprurëse e të nxehtit.
Franca gjatë periudhës qershor-korrik, shënoi temperaturën rekord prej 46 gradësh Celsius, që është më e larta në historinë e saj.
Temperaturat e larta thyen rekorde edhe në vende të tjera të Evropës, përfshirë Mbretërinë e Bashkuar, Belgjikën, Gjermaninë, Luksemburgun dhe Holandën.
