Një tjetër kandidat për Këshillin e Emërimeve në Drejtësi është në prag të shkarkimit nga komisioni i vettingut. Enton Dhimitri, gjyqtar i Apelit në Gjirokastër, nuk e ka deklaruar faktin se kunati i tij është i dënuar në Greqi për trafik të lëndëve narkotike. Sot është zhvilluar seanca dëgjimore, ku i pranishëm ishte edhe vetë gjyqtari.
Relatorja e çështjes, Pamela Qirko, tha se hetimi për këtë gjyqtar ishte bërë në të tre komponentët, pasuri, aftësi profesionale dhe integritet. Në aftësitë profesionale dhe pasuri gjyqtari doli i pastër, por probleme janë konstatuar në drejtim të integritetit.
Sipas realtores Qirko, Komisioni kishte marrë informacione që kunati i gjyqtarit rezultonte i dënuar në Greqi me 20 vite burg për trafikim të lëndëve narkotike. OMN ka marrë informacione në Greqi dhe rezultoi se ky fakt ishte i vërtetë. Gjyqtari Dhimitri deklaraoi në seancë se nuk kishte marrëdhënie me kunatin, ndërsa në lidhje me dënimin e tij në Greqi ishte vënë në dijeni shumë kohë më vonë. Vendimi përfundimtar për të do te shpallet nesër në orën 09:00.
