Ministrja e Financave dhe Ekonomisë, Anila Denaj si dhe Drejtoresha Rajonale e Bankës Botërore për Ballkanin Perëndimor Linda van Gelder nënshkruan në Vjenë (Austri) marrëveshjen prej 9.1 milionë eurosh në funksion të politikave për zhvillim që do të mundësojnë rritjen e pjesëmarrjes së gruas në tregun e punës, kapitaleve dhe atë financiar.

“Sot mendojmë se nëpërmjet kësaj marrëveshjeje kemi arritur një hap të rëndësishëm përpara për të iniciuar një udhëtim relativisht të gjatë për ta bërë gruan një forcë jo vetëm në tregun e punës por edhe të kapitalit e atë financiar”, deklaroi ministrja Denaj.

Ne synojmë, shtoi ajo, të rrisim politik bërjen në mënyrë që të kemi instrumentet e nevojshme për të mbështetur gruan, si një forcë shumë e rëndësishme për të zhvilluar ekonominë.

Sipas Denajt, me mbështetjen e Bankës Botërore, Shqipëria ka ecur para në shumë reforma. Ajo shprehu besimin se edhe kjo reformë do të jetë e suksesshme.

Bashkëpunimi i Qeverisë shqiptare me Bankën Botërore dhe Agjencinë Franceze për Zhvillim do të intensifikojë përpjekjet tona në përmirësim të kuadrit të politikave për akses të barabartë gjinor në ekonomi dhe rritje të rolit të gruas në vend, duke u përqendruar në rritjen e aksesit të grave në pronësi, vendosjen e rregullave të barabarta të lojës për rritjen e mundësive për gratë në tregun e punës dhe forcimin e rregullave institucionale për një politikë bërje të informuar gjinore.