Europa dhe Gjermania në mënyrë të veçantë kritikuan sot votimin në SHBA të sanksioneve kundër gazsjellësit rus “Nord Stream 2”, vlerësuar nga promotorët e saj strategjikë për furnizimin, por akuzuar për rritjen e influencës së Moskës. “Në parim, BE-ja kundërshton vendosjen e sanksioneve kundër çdo kompanie të BE-së që ushtron një aktivitet legjitim”, theksoi sot komisioneri europian për Tregtinë, Phil Hogan. Gjermania, përfituesja më e madhe nga ky projekt, të cilës ky gazjellës i ka mundësuar dyfishimin e livrimeve të gazit natyror rus me çmim të lirë, ka shtuar për argumentet ekonomike një strukturë politike.
“Politika energjitike europiane vendoset në Europë dhe jo në SHBA. Ne hedhim poshtë në parim ndërhyrjet dhe sanksionet”, konfirmoi në Twitter ministri i Punëve të Jashtme, Heiko Maas. Njoftimet për sanksione amerikane janë konkretizuar pas miratimit nga Komisioni i Forcave të Armatosura të Dhomës së Përfaqësuesve të buxhetit të mbrojtjes amerikane për vitin fiskal 2020. Ai parashikon sanksione kundër gazsjellësit “Nord Stream 2” dhe “Turkish Stream” në kuadër të masave kundër Rusisë.ATSH
