Zona e Shirgjanit në Elbasan është prodhuesja kryesore e prodhimeve bujqësore jo vetëm për tregun e Elbasanit, por edhe më gjerë.
Sekretari i Përgjithshëm i PS-së, Damian Gjiknuri, i shoqëruar dhe nga kryetari i bashkisë Gledjan Llatja ishte sot në një prej serrave të zonës, prodhimet e të cilave fermerët i dërgojnë në pikën e grumbullimit e më pas eksportohen drejt vendeve europiane.
Damian Gjiknuri, që është njëherësh dhe drejtues politik i qarkut të Elbasanit, siguroi fermerët për mbështetjen e vazhdueshme nga ana e qeverisë për shtimin e prodhimit dhe gjetjen e tregjeve për shitjen e tyre.
“Sfida më e madhe e njerëzimit do të jenë kostot e shtuara të çmimeve. Kush merret me bujqësi ka një të ardhme të garantuar”, theksoi Gjiknuri.
Ndërsa kryebashkiaku Gledian Llatja theksoi se përmirësimi i infrastrukturës ka sjellë më pranë prodhimet bujqësore me tregjet, duke ndihmuar në këtë mënyrë gjithë ekonominë e zonës.
“Rruga ka qenë një nga problematikat kryesore që ka pasur zona. Me ndërtimin e rrugës brenda dy viteve pothuajse është dyfishuar numri i serrave nga 30 hektarë në 70 hektarë”, u shpreh kryetari i bashkisë së Elbasanit.
Ndërtimi i unazës bujqësore ka krijuar lehtësi dhe i ka dhënë zhvillim gjithë zonës së Shirgjanit në Elbasan. Vitet e fundit disa kompani eksporti kanë shfaqur interes për prodhimet cilësore të zonës, çka ka sjellë dhe rritje të prodhimit.
