Shtyhet seanca ndaj gjyqtares Mimoza Margjeka. Shkak i shtyrjes së seances ishte mos paraqitja e gjyqtares në sallën e gjyqit pranë Gjykatës së Posaçme kundër Krimit dhe Korrupsionit. Margjeka akuzohet nga SPAK për korrupsion, pasi nga përgjimet e Prokurorisë së Posaçme rezultoi se, ajo ka marrë 6000 euro në këmbim të nxjerrjes së Orion Balit nga qelia kundrejt “garancisë pasurore”.
Së bashku me Margjekën në atë kohë SPAK mori nën hetim edhe bashkëshortin e gjyqtares, Arben Cara, avokatin e Balit, Skënder Demiraj, vëllanë e të pandehurit Nejton Balin dhe sekserin Klaudjo Zhilla.
Gjyqtarja Mimoza Margjeka, më herët pasi mësoi vendimin e Gjykatës së Apelit për të lënë në fuqi masën për “arrest shtëpie”, foli me tone të ashpërta. Ajo pati përplasje fizike me një polic duke thënë para mediave se i kanë hequr të drejtën e fjalës. Margjeka nuk hezitoi të thoshte se arsyeja përse e kanë çuar në gjykatë është se nuk i dha mandatin Valbona Sakos.
Margjekës pretendon se gjykata nuk ka asnjë provë për akuzat ndaj saj. Kujtojmë se në kohën kur ishte pjesë e gjykatës së Durrësit vendosi që të mos i jepte mandatin e kryebashkiakes socialistes Valbona Sako, e cila doli nga zgjedhjet njëpartiake të 30 Qershorit. Vetë Margjeka i ka mohuar që prej ditës së parë akuzat dhe është shprehur se i gjithë procesi ndaj saj është i montuar politikisht.
