Vetëm për katër vota, demokratët kanë dështuar në përpjekjen e tyre për të thirrur dëshmitarë në gjyqin ndaj presidentit amerikan Donald Trump.
Senatorët demokratë kishin nevojë vetëm për 4 vota të republikanëve për të arritur qëllimin e tyre për të thirrur në gjyq persona që do dëshmonin kundër Trump. Më herët, një prej senatorëve republikanë deklaroi se nuk do ta mbështesë kërkesën, çka vuri në pikëpyetje gjithë përpjekjet e demokrate.
Senatori, Lamar Alexander, tha se demokratët e kanë dëshmuar se Trump kishte vepruar në mënyrë të papërshtatshme, por kjo nuk ishte një vepër për shkarkim.
Për çfarë akuzohet Trumpi?
Presidenti amerikan akuzohet për abuzim të pushtetit në lidhje me veprimet e tij kundrejt Ukrainës, si dhe për pengim të punës së Kongresit, i cili menjëherë ka nisur hetime lidhur me veprimet e Trumpit.
Demokratët në Dhomën e Përfaqësuesve kanë thënë se Trump ka pezulluar ndihmën ushtarake në vlerë të 400 milionë dollarëve për Ukrainën, dhe ftesën për vizitë në Shtëpinë e Bardhë për presidentin e ri ukrainas, Volodymyr Zelenskiy, duke i kërkuar Kievit që të nisë hetime kundër një rivali politik.
Trump ka kërkuar nga Ukraina të hetojë Joe Bidenin, i cili është aktualisht një prej kandidatëve kyçë në garën e demokratëve për ta sfiduar Trumpin.
