DVP Fier Operacion për evidentimin dhe goditjen e veprimtarisë së kundërligjshme në fushën e lojërave të fatit. Operacioni, në zbatim të detyrave të Planit të Masave të hartuar nga Drejtoria e Përgjithshme e Policisë së Shtetit “Për kontrollin e territorit, identifikimin, dokumentimin, parandalimin dhe goditjen e aktivitetit të paligjshëm të lojërave të fatit”.
Në kuadër të operacionit “Gjysëmfinalja” në qarkun Fier janë kontrolluar 17 ambiente në të cilat dyshohej se mund të ushtrohej aktiviteti i kundërligjshëm i lojërave të fatit, kryesisht në fushën e basteve.
Nga kontrollet e ushtruara është arrestuar në flagrancë 1 shtetas dhe u procedua penalisht në gjendje të lirë 1 tjetër.
Nga specialistët për Hetimin e Krimeve në Komisariatin e Policisë Divjakë, u bë arrestimi në flagrancë i shtetasit Klaudio Çela ., 33 vjeç, banues në Babunjë, Divjakë, pasi gjatë kontrollit të lokalit në pronësi të shtetasit Z. K., u konstatua nga shërbimet e Policisë me një aparat celular i cili kishte të instaluar programin që përdorej për organizimin e lojrave të fatit, lloto sporti.
Gjithashtu filloi procedimi penal për shtetasin G. S., 46 vjeç, banues në Çeren i Vogël, pasi gjatë kontrollit në lokalin në pronësi të tij, u gjet një kartë sim e cila do të dërgohet për ekzaminim pranë Institutit të Policisë Shkencore, e cila dyshohet se përdoret për zhvillimin e lojrave të fatit.
Drejtoria Vendore e Policisë Fier fton qytetarët që të denoncojnë në Komisariatin Dixhital dhe në numrin pa pagesë 112, çdo rast të paligjshmërisë, duke iu garantuar anonimat të plotë, reagim të menjëhershëm dhe të paanshëm.
