Ata mund të quhen gjithçka bërës. Nga tregtarë kokaine, në “skifterë” të natës e deri tek sherrxhinj që s’kanë nguruar të shkrepin armën brenda një klubi nate për aryse xhelozie. Po flasim për një katërshe jo “superheronjësh” por banditësh të mirëfillitë shqiptarë, që kanë trazuar zonën e Riminit në Itali.
Në pranga të policisë italiane kanë përfunduar dy prej tyre, një 21-vjeçar dhe një 23-vjeçar, banues në Tavullia dhe Misano. Ndërkohë në kërkim janë edhe dy anëtarë të tjerë të bandës, burrë e grua, respektivisht 31 dhe 28 vjeç, me banim në Gradara, por për ta hestuesit besojnë se janë larguar nga Italia për në Shqipëri.
Grupi në fjalë ka kryer tregti të lëndëve narkotike në disa zona si Rimini, Riçione dhe Misano. I gjithë aktiviteti kriminal i bandës është dokumentuar nga policia. Hetimet për këtë bandë shqiptarësh nisën në marsin e 2017-ës, kur më i vjetri i grupit, 31 vjeçari u mbajt nën vëzhgim për disa javë, ndërsa ndaj bashkëshortes së tij ishte lëshuar një urdhër dëbimi.
Pavarësisht se arrinin të përfitonin sasi të mëdha parash nga shitja e drogës, që ndodhte gjithmonë në restorante dhe klube nate, katërshja shqiptare ishte ortganizuar që në “kohën e lirë” ta shfrytëzonin për të kryer vjedhje. Dy prej tyre, respektivisht në një supermarket në Misano dhe në një restorant në Riçione kanë qenë të suksesshme, por një vjedhje ka mbetur në tentativë në një klub nate në Riçione, aty ku grupi ishte konfliktuar me të tjerë persona në ngjarje të mëparshme.
Policia nëpërmjet përgjimeve ka zbuluar se natën e 11 majit, disa anëtarë të bandës kishin hyrë me forcë brenda klubit dhe kishin hedhur benzinë, ndërsa ishte kalimi i një patrulle policie që i kishte detyruar të iknin pasi vendosën flakën. Shkaku ishte xhelozia e 23 vjeçarit shqiptar për partneren e tij marokene që punonte si balerinë aty. Ai nuk e pranoi dot faktin që partnerja të punonte si striptiste, prandaj kërcënoi drejtuesin e klubit të natës.
