Ish kampioni i botës me Italinë dhe fituesi i Këpucës së Artë në sezonin 2005-2006, Luca Toni ka kaluar momente paniku të enjten në mbrëmje, pasi tre hajdutë të maskuar dhe të armatosur kanë grabitur vilën e tij në Modenese.
Lajmi është dhënë nga mediat italiane, të cilat zbardhin dëshminë e Tonit se grabitja ka ndodhur të enjten mes orës 19:30 dhe 21:30, ndërkohë që ish sulmuesi italian ndodhej aty bashkë me fëmijët e tij.
Përveç panikut, Toni dhe fëmijët e tij nuk kanë pësuar asgjë, ndërsa policia po heton dhe vëzhgon kamerat e sigurisë për të rënë në gjurmën e grabitësve. Paraprakisht mendohet se ishin 4 grabitës, tre prej të cilëve u futën në vilën e sulmuesit dhe një tjetër i priste jashtë në një makinë Audi.
Ndërkohë vetë futbollisti ka reaguar në një postim në rrjetet sociale ku shprehet se gjëja më e rëndësishme në këto momente është familja e tij, e cila është mirë.
”Ndërsa qarkullon lajmi, unë doja të raportoja se të enjten në mbrëmje pësova një vjedhje shtëpie nga tre kriminelë që mbanin dhe armë. Gjëja që ka më shumë rëndësi është se familja ime është mirë. Më vjen keq gjithashtu që kriminelët më morën mallrat e çmuar, por mbi të gjitha ato me vlerë emocionale.
Pas grabitjes, policia ndërhyri, ndoshta e thirrur nga fqinjët që kanë parë një makinë të dyshimtë që lëvizte në rrugën time; mbikëqyrja nuk vuri re asgjë. Unë kërkoj respekt dhe privatësi për mua dhe familjen time në këtë kohë. faleminderit të gjithëve”, shkruan ai.
