Reshjet intensive të shiut kanë shkaktuar probleme serioze në infrastrukturën rrugore të Gramshit. Ura e Shëmrizës ka pësuar dëmtime në njërin krah, duke e vështirësuar kalimin e mjeteve dhe duke rritur rrezikun për drejtuesit.
Policia ka ndërhyrë vetem diten e djeshme duke ndaluar qarkullimin e mjeteve të rënda ndërkohë që ditën e sotme nuk ka pasur grupe në terren,ndërsa dëmtimi i urës ka ndikim të drejtpërdrejtë në qarkullimin e tre njësive administrative, ku jetojnë rreth 2500 banorë.
Banorët e zonës shprehen të shqetësuar dhe thonë se ndihen të rrezikuar nga dëmtimet e shkaktuara në urë, duke theksuar se masat parandaluese duhej të ishin marrë më herët.
Ata shprehen se kjo situate nuk mund të kalohet vetem duke hedhur zhavor në urë.
Drejtori i mbrojtjes Civile Oligert Kllogjeri shprehet se problematikat e hasura kane qenë te shumta por problematika e ures ishte mjaft shqetësuese pasi nëse do të shkatërrohej do të bllokoheshin 3 njësi administrative.
Probleme janë raportuar edhe në aksin Kodovjat–Mashan, ku një masiv dheu është shembur duke bllokuar rrugën kryesore. Autoritetet lokale dhe strukturat e emergjencave u bëjnë apel qytetarëve të shmangin lëvizjet e panevojshme në zonat me rrezik.
