Pasi u kap dhe u dënua narkotrafikanti më famëkeq i viteve të fundit, El Chapo, prokurorët kanë nisur tanimë të merren me çështjen e gruas së tij, Emma Coronel Auispuro. Ndaj 29-vjeçares nuk ka deri më tani një akuzë zyrtare, por roli i saj brenda organizatës kriminale po hetohet.
E megjithatë, kjo nuk e ka penguar aspak gruan e Joagin Guzmann që të regjistrojë në SHBA markën e biznesit “El Chapo Guzman” në zyrën e patentave. Sipas një zëdhënëseje të skuadrës së avokatëve të kreut të kartelit të Sinaloas, ky është një projekt për të cilin Emma dhe Joaquin kanë vite, që e diskutojnë.
Paralelisht me gruan e El Chapos edhe Alejandrina Guzmann Salazar, një prej 10 fëmijëve të El Chapos, i ka dhënë jetë kompanisë së saj të veshjeve dhe aksesorëve. “El Chapo 701”, ndonëse nuk është regjistruar ende në Shtetet e Bashkuara të Amerikës, ka një faqe zyrtare në internet dhe rrjetet sociale.
Sikurse mund të kuptohet, midis gruas dhe vajzës së narkotrafikantit famëkeq duket se do të ketë “luftë” për emrin identifikues të bizneseve.
