Tre të rinj janë vënë në pranga nga uniformat blu dhe një tjetër është shpallur në kërkim në kuadër të operacionit të koduar “ETALON”.
Ata akuzohen si autorë të ngjarjes së 4 janarit të këtij viti, ku në bashkëpunim me njëri-tjetrin kanë hyrë në banesën e shtetasit H. R., në Memaliaj dhe kanë vjedhur me dhunë një sasi lekësh.
Peronat e arrestuar janë shtetasit: E. A., 23 vjeç, A. R., 22 vjeç dhe F. R., 28 vjeç, banues në Durrës. Ndërsa për personin e shpallur në kërkim vijon puna për kapjen e tij.
Në cilësinë e provës materiale u sekuestruan një automjet, një pjesë e lekëve të vjedhura dhe 4 celularë. Gjithashtu, në automjet u gjetën dhe u sekuestruan dhe dy doza me lëndë të dyshuar narkotike kokainë.
Ky grup, me pseudonimin “Etalon”, dyshohet se ka kryer dhe një sërë vjedhjesh të tjera në qarqe të ndryshme, për të cilat vijon puna për zbardhjen dhe dokumentimin me prova ligjore.
Materialet në ngarkim të këtyre shtetasve i kaluan Prokurorisë pranë Gjykatës së Shkallës së Parë Gjirokastër, për veprat penale “Vjedhja me dhunë” e kryer në bashkëpunim dhe “Prodhimi dhe shitje e lëndëve narkotike”.
