Ditën e sotme është nënshkruar një partneritet i ri mes shtetit, sistemit bankar dhe sipërmarrjes shqiptare për Programin Kombëtar të Financimit të Ndërmarrjeve të Vogla dhe të Mesme (NVM) nën emrin “Dyfisho Sipërmarrjen Tënde”.
I pranishëm ka qenë edhe kryeministri Edi Rama i cili gjatë fjalës së tij, ka theksuar mbështetjen që përfitojnë bizneset e vogla dhe të mesme nga kjo marrëveshje.
Po ashtu në takim kanë qenë pjesë, Delina Ibrahimaj, ministre e Ekonomisë dhe Inovacionit, Guvernatori i Bankës së Shqipërisë Gent Sejko, Petrit Malaj, Ministër i Financave, Seyhan Pencabligil, Zëvendëskryetar i Shoqatës Shqiptare të Bankave, Drejtor i Përgjithshëm dhe Anëtar i Bordit Drejtues të BKT si edhe përfaqësues nga bankat e nivelit të dytë.
“Sot të gjithë ata që kanë një ndërmaje të vogël apo të mesme duhet ta dëgjojnë se pas firmosjes së kësaj marrëveshje do t’u hapet një derë për ta dyfishuar biznesin e tyre” është shprehur Kryeministri gjatë fjalës së tij.
Duke shtuar më tej se bizneseve të vogla dhe të mesme do t’u vihet në dispozicion një mundësi kredie me interes shumë të ulët 2-3%, e shoqëruar me garancinë e qeverisë.
“Falë bashkëpunimit dhe disponimit të bankës së Shqipërisë për ta mbështetur rritjen ekonomike përmes rritjes së ndërmarrjeve të vogla dhe të mesme, kështu që për to do të vihet në dispozicion një linjë kredie me interes minimal 2 % dhe maksimal 3%, e shoqëruar me një garanci sovrane të qeverisë shqiptare për të ulur riskun e kredisë për bankat .
Dhe natyrisht që nuk do harroj të them se bankat duhet të jenë pak më kurajoze edhe në raport me sektorin e bujqësisë, ku niveli i riskut është i lartë, por ku kemi mësuar se projektet kanë një risk më të ulët dhe që lidhen me agrobiznesin dhe teknologjitë e reja”, u shpreh ndër të tjera Rama.
