Ministria e Shëndetësisë në Holandë ka njoftuar se ata që duan të shkojnë në tualete publike, duhet të kenë certifikatën anti- Covid, ndonëse kjo nuk është e detyruar për të frekuentuar baret. “Nëse doni të përdorni tualetin, do t’ju duhet të tregoni kodin tuaj”, njoftoi ministria. Ajo më tej shtoi se një kod QR që konfirmon se një person është vaksinuar është i detyrueshëm për qytetarët që nga mosha 13-vjeç.

Kujtojmë se javën që shkoi, qeveria holandeze hoqi disa kufizime për parandalimin e Covid-19, si distanca fizike, por njoftuan lejet COVID për bare, restorante dhe festivale. Ndërkohë, së fundmi, kryeministri i vendit, Mark Rutte tha se nuk është një ide e mirë për të bërë një përjashtim për klientët që ulen në tarracat e kafeneve, sepse njerëzit në mënyrë të pashmangshme do të duhet të hyjnë për të paguar faturën ose për të shkuar në tualet.