Ilia, Rozeta, dhe Sabina do të jetojnë së bashku në shtëpinë e re, pas humbjes së pazëvendësueshme të Xhesikës 20 vjeçare në tragjedinë që shkaktoi tërmeti i 26 nëntorit, kur një parapet do të shkëputej nga pallati si pasojë e lëkundjeve. Bashkë me 20-vjeçaren e cila sapo kishte nisur ëndrrën e saj për t’u bërë arkitekte, do të mbeteshin të lënduara edhe nëna dhe motra e saj, por që mundën të shpëtojnë.
Kryeministri Edi Rama i shoqëruar nga kryebashkiaku i Tiranës, Erion Veliaj, vizituan të shtunën pasdite, shtëpinë ku është akomoduar kjo familje, në banesën e tyre të re 2+1 në kryeqytet në zonën e Kombinatit. Kryeministri Rama u shprehu ngushëllime për ndarjen nga jeta të vajzës Xhesika Biqiku, dhe theksoi se do të bëhet gjithçka që pjesëtarët e familjes së saj të vijojnë jetën në mënyrë që t’ju lehtësohet sa të jetë e mundur edhe dhimbja e madhe.
“Ne jemi dhe do t’u jemi pranë atyre dhe çdokujt në nevojë, megjithë zemër e me të gjitha mundësitë tona”, u shpreh Rama. Familjarët falënderuan kreun e qeverisë, si dhe kryebashkiakun Veliaj për gjithë angazhimin që nga momentet e para për të shpëtuar jetën e vajzës dhe për përkujdesjen në vijim. Kryeministri Rama i dorëzoi vajzës së vogël Sabinës edhe tre libra, një nga pasionet e saj më të mëdha në jetë. Bashkë me qeverinë, në kryeqytet janë strehuar nga Bashkia e Tiranës edhe shumë prej familjeve të cilat humbën pjesëtarë në Thumanë duke nisur një jetë të re. Bashkia është përkujdesur që krahas ofrimit të një banese me kushte komode, të ofrojë edhe mbështetje të vazhdueshme me shërbim social dhe shëndetësor. e.xh/ /a.g*
